इरानको मध्यस्थतामा साउदी अरबद्वारा हुथी विद्रोहीलाई १ अर्ब डलरको युद्धविराम प्रस्ताव
साउदी अरबले इरानको मध्यस्थतामा यमनका हुथी विद्रोहीहरूलाई आक्रमण रोक्न र युद्धविराम लागू गर्न १ अर्ब अमेरिकी डलर उपलब्ध गराउने प्रस्ताव गरेको रिपोर्टहरू बाहिर आएका छन्। साउदी रक्षा मन्त्रीको तेहरान भ्रमणका क्रममा हुथी विद्रोहीसँग सम्बन्धित वित्तीय तथा शान्ति समझदारीबारे छलफल भएको जनाइएको छ।
कूटनीतिक स्रोतहरूका अनुसार यसअघि साउदी अरब र हुथी समूहबीच भएका समझदारी अन्तर्गत विद्रोही नियन्त्रित क्षेत्रका कर्मचारीहरूको तलब भत्ता र पूर्वाधार पुनर्निर्माणका लागि साउदीले प्रत्यक्ष आर्थिक सहयोग पुर्याउने सहमति भएको थियो। त्यसको साटो हुथी समूहले साउदी अरबका तेल प्रशोधन केन्द्र तथा विमानस्थलहरूमा गर्दै आएका हवाई र क्षेप्यास्त्र आक्रमणहरू रोक्नुपर्ने शर्त राखिएको छ।
इरानले क्षेत्रीय सुरक्षा तथा अमेरिकी प्रभावलाई कम गर्ने रणनीतिका रूपमा दुई पक्षबीच मध्यस्थकर्ताको भूमिका निर्वाह गरिरहेको बताइएको छ। यद्यपि, साउदी अधिकारीहरूले रकम हस्तान्तरण भइसकेको औपचारिक पुष्टि नगरे पनि यमनमा जारी दीर्घकालीन तनाव अन्त्य र इन्धन आपूर्ति सुरक्षाका लागि वार्ताहरू तीव्र पारिएको संकेत मिलेको छ।
