हिन्दू स्वयंसेवक संघ नेपालको आयोजनामा सञ्चालित ७ दिने आवासीय प्राथमिक शिक्षा वर्ग २०८३ को समापन कार्यक्रम वीरगन्जमा भव्य रूपमा सम्पन्न भएको छ ।
वीरगन्ज । हिन्दू स्वयंसेवक संघ नेपालको आयोजनामा सञ्चालित ७ दिने आवासीय प्राथमिक शिक्षा वर्ग २०८३ को समापन कार्यक्रम वीरगन्जमा भव्य रूपमा सम्पन्न भएको छ ।
गत सात दिनदेखि सञ्चालित शिविरमा सहभागी स्वयंसेवकहरूले तालिमका क्रममा हासिल गरेका शारीरिक, मानसिक एवं बौद्धिक अनुशासनका विभिन्न कौशल तथा अभ्यासहरूको रोमाञ्चक झलक प्रस्तुत गरेका थिए ।
कार्यक्रममा माननीय विभाग सञ्चालक अशोक बैद्य, माननीय जिल्ला सञ्चालक माधव राजपाल, नगर सञ्चालक प्रेम कुशवाहा, वीरगन्ज भिस्वा गुम्बाका प्रतिनिधि र राष्ट्रिय सह-कार्यवाह रन्जित सराफ लगायत विभिन्न विशिष्ट व्यक्तित्वहरूको उपस्थिति रहेको थियो ।
अनुशासित प्रदर्शन र झाँकी पश्चात् स्वयंसेवक सहभागीहरूले वीरगन्ज महानगरपालिकाका विभिन्न मुख्य स्थानहरूमा भव्य र्याली निकालेका थिए । बजार तथा नगरका प्रमुख मार्गहरू परिक्रमा गर्दै निकालिएको उक्त र्यालीसँगै कार्यक्रमको औपचारिक समापन गरिएको थियो ।
समापन समारोहलाई सम्बोधन गर्दै सहभागी वक्ताहरूले पछिल्लो समय हिन्दू धर्म र संस्कृतिमाथि विभिन्न माध्यमबाट प्रहार भइरहेको भन्दै चिन्ता व्यक्त गरे । वक्ताहरूले सम्पूर्ण नेपालीहरूले नेपाल र हिन्दू धर्मको सम्मान गर्नुपर्नेमा जोड दिँदै अब नेपाल पुनः हिन्दू राष्ट्र बन्ने विश्वास व्यक्त गरेका थिए ।
