पोखरामा स्कुल बस दुर्घटना: ४ विद्यार्थीसहित ५ जनाको मृत्यु

पोखरा, २४ असोज — पोखरा महानगरपालिका–२८ कालिकास्थित ओख्लेको भिरमा विद्यालयको बस दुर्घटना हुँदा ४ जना विद्यार्थीसहित ५ जनाको मृत्यु भएको छ।
​माझठाना क्षेत्रबाट कालिका बोर्डिङ स्कुलका विद्यार्थी लिएर विद्यालयतर्फ आउँदै गरेको ग १ क ६२१९ नम्बरको बस सडकबाट तल खसेर दुर्घटनामा परेको हो।
​दुर्घटनामा परी गम्भीर घाइते भएकाहरूलाई उपचारका लागि पश्चिमाञ्चल क्षेत्रीय अस्पताल र पोखरा स्वास्थ्य विज्ञान प्रतिष्ठान लगिएकोमा ५ जनाको मृत्यु पुष्टि भएको जिल्ला प्रहरी कार्यालय कास्कीले जनाएको छ।
​बसमा २४ जनाभन्दा बढी विद्यार्थी, शिक्षक तथा चालक सवार थिए। दुर्घटनाको कारण खुलेको छैन भने घाइतेहरूको उद्धार तथा उपचार जारी रहेको प्रहरीले जनाएको छ