नेपाली सेनाले डीडीसीबाट दैनिक १० हजार लिटर दूध किन्ने

काठमाडौँ। नेपाली सेनाले सरकारी स्वामित्वमा रहेको दुग्ध विकास संस्थान (डीडीसी)बाट दैनिक १० हजार २५१ लिटर प्रशोधित दूध खरिद गर्ने भएको छ।
​दुवै संस्थाबिच भएको खरिद सम्झौता अनुसार सेनाले दूधका साथै दैनिक ३६५ किलो दही, ३७ किलो पनिर, २१ किलो होल मिल्क पाउडर र १५ किलो चिजसमेत खरिद गर्नेछ। सम्झौतापत्रमा डीडीसीका महाप्रबन्धक डा. शरणकुमार पाण्डे र नेपाली सेनाको आपूर्ति तथा परिवहन निर्देशनालयका सहायक रथी सञ्जयकुमार रञ्जितले हस्ताक्षर गरेका हुन्।
​आगामी आगामी १ माघदेखि लागू हुने यो सम्झौताले नेपाली सेनाका ३२ जिल्लाका ब्यारेक तथा युनिटहरूमा गुणस्तरीय दुग्धजन्य पदार्थको नियमित आपूर्ति सुनिश्चित गर्ने र स्वदेशी दुग्ध उत्पादनको खपत बढाउन सहयोग पुग्ने विश्वास लिइएको छ।