हेटौँडाबाट स्रोत नखुलेको २१ लाख ४० हजार नगदसहित दुई जना पक्राउ

हेटौँडा, मकवानपुर — स्रोत नखुलेको २१ लाख ४० हजार रुपैयाँ नगदसहित दुई जनालाई मकवानपुर प्रहरीले नियन्त्रणमा लिएको छ। हेटौँडा उपमहानगरपालिका–१ स्थिति चौकीटोलबाट सोमबार साँझ उनीहरूलाई सशस्त्र प्रहरी बलको टोलीले पक्राउ गरेको हो।
​पक्राउ पर्नेहरूमा लुम्बिनी प्रदेश ०१–००१ च ०२०९ नम्बरको इसुजु डिम्याक्स गाडीका चालक, धादिङ नीलकण्ठ नगरपालिका–८ का ३२ वर्षीय विजय खाती र गाडीमा सवार मकवानपुर राक्सिराङ गाउँपालिका–१ का ४० वर्षीय सिंहराम रुम्बा रहेका छन्।
​वीरगन्जबाट हेटौँडातर्फ आउँदै गरेको उक्त गाडीलाई सशस्त्र प्रहरी बल नेपाल नम्बर १४ गण हेडक्वार्टर मकवानपुरको गस्ती टोलीले हेटौँडा–भीमफेदी सडकखण्डमा रोकेर जाँच गरेको थियो। सोही क्रममा गाडीभित्र कालो प्लास्टिकको झोलामा लुकाई राखिएको अवस्थामा १ हजार र ५ सय दरका नेपाली नोट फेला परेको प्रहरीले जनाएको छ।
​बरामद रकम, गाडी र नियन्त्रणमा लिइएका दुवै जनालाई थप कारबाहीका लागि नेपाल प्रहरीलाई बुझाइएको छ। उनीहरूमाथि नेपाल राष्ट्र बैंक ऐन, २०५८ अन्तर्गत मुद्दा दर्ता गरी मकवानपुर जिल्ला अदालतबाट १५ दिनको हिरासत म्याद थप गरेर अनुसन्धान अघि बढाइएको प्रहरीले जनाएको छ।