छिपहरमाईका जनप्रतिनिधिलाई प्रश्न: जनताले कर तिर्ने हिलोमा पौडिनका लागि हो?

पर्सा — जनप्रतिनिधि फेरिए, बजेट आए, तर पर्साको छिपहरमाई गाउँपालिका वडा नं. ०२, बडका टिहुकीका जनताको नियति भने अझै फेरिन सकेको छैन। गोपचन ठाकुरको घरदेखि भेली साहको घरसम्मको सडकखण्ड वर्षौंदेखि दयनीय अवस्थामा छाडिँदा स्थानीयवासी ढल र हिलोको आहालमा जीवन बिताउन बाध्य छन्।

विगत ९ वर्षको अवधिमा सडक सुधारका नाममा केही ट्र्याक्टर इँटाका टुक्रा खसालेर बजेट सकाउने काम मात्र भएको स्थानीयको आरोप छ। न पक्की सडक बनेको छ, न त पानी निकासका लागि नाली नै। वर्षायाममा मात्र होइन, वर्षैभरि सडकमा पानी थुप्रिएर बाटो नै हिलाम्मे बन्ने गरेको छ। दशैं, तिहार र छठजस्ता ठूला चाडपर्वमा गाउँ आउजाउ गर्ने सर्वसाधारणले हिलो पन्छाउँदै हिँड्नुपर्ने बाध्यता छ।

जनताले कुनै ठूलो समृद्धिको सपना मागेका होइनन्, केवल हिँड्न मिल्ने बाटो र निकासयुक्त नाली जस्ता आधारभूत अधिकार मागेका हुन्। तर, सर्वसाधारणको करबाट उठेको सार्वजनिक स्रोतमा मोजमस्ती गर्ने सम्बन्धित निकाय र जिम्मेवार व्यक्तिहरू जनताको यो दयनीय अवस्थाप्रति पूर्णतः बेखबर बनेका छन्।

अब प्रश्न उठ्छ— यो सडक नबन्नु लाचारी हो कि नियतको खोट? यो केवल व्यवस्थापनको कमजोरी मात्र नभई जनताको मौलिक अधिकारमाथि गरिएको चरम बेवास्ता हो। आश्वासनको पोको बाँडेर मात्र पुग्दैन; छिपहरमाई गाउँपालिका र वडा कार्यालयले अविलम्ब ढल र सडक निर्माणको ठोस र स्थायी काम सुरु गरेर देखाउनै पर्छ।