काम गर्न नसके अर्को चुनावमा डाँडा कटाइदिनुस्' : रास्वपा सभापति रवि लामिछाने

'काम गर्न नसके अर्को चुनावमा डाँडा कटाइदिनुस्' : रास्वपा सभापति रवि लामिछाने

काठमाडौँ— राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो दलले प्रतिबद्धता अनुसार काम गर्न नसके आगामी चुनावमा जनताले बहिष्कार गर्नुपर्ने र कार्यकर्ताले पार्टीको सदस्यता नै च्यात्नुपर्ने बताएका छन्। नेपाली काङ्ग्रेसको महाधिवेशनको मञ्चबाट सम्बोधन गर्दै उनले जनतासामु दिएको बाचा र कार्यसम्पादनप्रति पार्टी पूर्ण रूपमा जबाफदेही हुनुपर्ने धारणा राखेका हुन्।
"हामीले काम गर्न सकेनौँ भने अर्को चुनावमा हामीलाई डाँडा कटाइदिनुस्। मैले चुनावमा भनेको यही हो,"

लामिछानेले भने, "तपाईंहरू मध्ये यहीँ उपस्थित कतिपय मान्छेहरूले पनि भोट त्यही कारणले हाल्नुभएको हो। नेपाली काङ्ग्रेसको यस ऐतिहासिक मञ्चमा उभिएर म यस कुरामा अझै पनि अडिग छु र म मेरै दलका साथीहरूलाई भन्न चाहन्छु, यो पाँच वर्ष रा.स्व.पा ले काम गर्न सकेन भने सबैभन्दा पहिला रा.स्व.पा को सदस्यता च्यात्नुहोला। यति भन्न सक्ने आँट हामीले राखेका छौँ।"

सम्बोधनका क्रममा उनले चुनावी अभियानका क्रममा व्यक्त गरेका प्रतिबद्धतालाई पुनः स्मरण गराउँदै नयाँ राजनीतिक संस्कृति र राजनीतिक आँटको आवश्यकता औँल्याए। कार्यसम्पादन फितलो भएमा नागरिक स्तरबाट मात्र नभई आफ्नै सङ्गठन भित्रैबाट दण्डित हुन तयार रहेको सन्देश दिँदै उनले पार्टीले जनअपेक्षा अनुसार नै काम गर्ने दाबी समेत गरे।