राणा र पञ्चायत ढालेजस्तै वर्तमान सरकार ढाल्न कांग्रेससँग सहकार्यको समय आयो: शंकर पोखरेल

‘लोकतन्त्रको रक्षाका लागि पुनः कांग्रेससँग सहकार्यको समय आयो’ : शंकर पोखरेल

काठमाडौँ। नेकपा (एमाले) का महासचिव शंकर पोखरेलले वर्तमान सरकारको कार्यशैलीप्रति कडा आपत्ति जनाउँदै लोकतन्त्रको रक्षाका लागि नेपाली कांग्रेससँग पुनः सहकार्य गरेर अघि बढ्ने समय आएको बताएका छन्।

नेपाली कांग्रेसको १५औँ महाधिवेशनको अवसरमा बोल्दै महासचिव पोखरेलले वर्तमान सरकार राजनीतिक दलहरूसँग सहकार्य र छलफल नगरी स्वेच्छाचारी ढंगले अघि बढिरहेको आरोप लगाए। प्रधानमन्त्रीले संसद् र जनताका आवाजलाई पूर्ण रूपमा उपेक्षा गरेको भन्दै उनले सरकारको कदमले लोकतान्त्रिक मूल्य–मान्यतामाथि नै प्रश्न उठाएको टिप्पणी गरे।
कार्यक्रमलाई सम्बोधन गर्दै पोखरेलले भने, “अब फेरि पनि मिलेर लोकतन्त्र र यो देशको मुहार फेर्न लाग्नुपर्ने समय आएको छ। इतिहासमा राणाशासन, पञ्चायत र ज्ञानेन्द्र शाहको निरंकुश शासनविरुद्ध हामी मिलेर लडेका थियौँ। अब फेरि पनि कांग्रेससँगको सहकार्यमा लोकतन्त्रको रक्षाका लागि लड्नेछौँ।”

पोखरेलले वर्तमान राजनीतिक परिस्थितिमा कांग्रेसको भूमिका महत्त्वपूर्ण हुने उल्लेख गर्दै आगामी दिनमा लोकतान्त्रिक व्यवस्था र राजनीतिक दलहरूको अस्तित्व जोगाउन कांग्रेसले नेतृत्वदायी भूमिका निर्वाह गर्ने विश्वास व्यक्त गरे। उनले मुलुकलाई संकटबाट जोगाउन र लोकतान्त्रिक प्रणाली सुदृढ बनाउन प्रमुख राजनीतिक शक्तिहरू एकाकार हुनुको विकल्प नरहेकोमा जोड दिए।