नेपाली कांग्रेसको १५औँ महाधिवेशन: पूर्वसभापति देउवालाई प्रमुख अतिथिको निम्तो

नेपाली कांग्रेसले उद्घाटन हुन लागेको १५औँ महाधिवेशनका लागि पूर्वसभापति शेरबहादुर देउवालाई प्रमुख अतिथिको रूपमा औपचारिक निमन्त्रणा गरेको छ।

​पार्टी सभापति गगनकुमार थापाको हस्ताक्षर रहेको निमन्त्रणा पत्र लिएर सहमहामन्त्री योगेन्द्र चौधरी नेतृत्वको टोली चुनदेवीस्थित देउवा निवास पुगेको थियो। तर, सो क्रममा पूर्वसभापति देउवासँग प्रत्यक्ष भेट भने हुन सकेन।

​सहमहामन्त्री चौधरीका अनुसार देउवाका स्वकीय सचिव भानु देउवालाई सम्पर्क गर्ने प्रयास गर्दा पनि सम्पर्क हुन नसकेपछि उक्त निमन्त्रणा पत्र देउवा निवासमा रहेका सुरक्षाकर्मीलाई हस्तान्तरण गरेर टोली फर्किएको छ। कांग्रेसले आफ्नो १५औँ महाधिवेशनको भव्य तयारी गरिरहेका बेला पूर्वसभापति देउवाको उपस्थितिलाई विशेष महत्वका साथ हेरिएको छ।