कांग्रेस १५औँ महाधिवेशन: गगन थापासँग भिड्न किशोर सिंह राठौरको दाबी

कांग्रेस १५औँ महाधिवेशन: गगन थापासँग भिड्न किशोर सिंह राठौरको दाबी
​नेपाली कांग्रेसका पूर्वसहमहामन्त्री एवम् नेविसंघका पूर्वअध्यक्ष किशोर सिंह राठौरले पार्टीको १५औँ महाधिवेशनमा सभापति पदका लागि उम्मेदवारी दिने घोषणा गरेका छन्। हालसम्म महाधिवेशन प्रतिनिधि चुनिन बाँकी रहे पनि उनले बर्दिया–२ बाट निर्वाचित भएर आउने र कुनै पनि हालतमा उम्मेदवारीबाट पछि नहट्ने अडान लिएका छन्।
​खबरहबसँगको कुराकानीमा राठौरले गगन थापाले पार्टीभित्रका विभिन्न धारलाई मिलाएर लैजान नसकेकाले आफूले नेतृत्वमा दाबी गरेको बताए। त्रिचन्द्र क्याम्पसको स्ववियु सभापति छँदा थापा सदस्य रहेको स्मरण गराउँदै राठौरले गगनलाई यसपटक आफूलाई समर्थन गर्न आग्रहसमेत गरेका छन्।
​पूर्वसभापति शेरबहादुर देउवाको 'डमी' उम्मेदवार भएको आरोपलाई खण्डन गर्दै उनले आफू स्वविवेकले मैदानमा उत्रिएको स्पष्ट पारे। यदि आफू सभापतिमा निर्वाचित भए आगामी स्थानीय तहको निर्वाचनसम्ममा विभाजनमा देखिएको कांग्रेसलाई एकताबद्ध बनाएर लैजाने उनको दाबी छ।