६ महिनाको प्रयासमा त्रिविको ७०५ रोपनी अतिक्रमित जग्गा फिर्ता: शिक्षामन्त्री पोखरेलद्वारा गरिमा फर्काउने प्रतिबद्धता
६ महिनाको प्रयासमा त्रिविको ७०५ रोपनी अतिक्रमित जग्गा फिर्ता: शिक्षामन्त्री पोखरेलद्वारा गरिमा फर्काउने प्रतिबद्धता
काठमाडौँ — वर्षौंदेखि अनधिकृत रूपमा ओगटिएको त्रिभुवन विश्वविद्यालय (त्रिवि) को करिब ७०५ रोपनी जग्गा सरकारले फिर्ता ल्याएको छ। मन्त्रालयको जिम्मेवारी सम्हालेलगत्तै त्रिविको गुमेको गरिमा फर्काउन र सम्पत्तिको संरक्षण गर्न लिइएको दृढ संकल्पस्वरूप यो सफलता प्राप्त भएको हो।
शिक्षा मन्त्री सुस्मित पोखरेलले मन्त्रालयको नेतृत्व सम्हालेकै दिनदेखि अतिक्रमित तथा अनधिकृत रूपमा प्रयोग भएका जग्गाहरू खाली गराउन उच्च प्राथमिकताका साथ निर्देशन दिएका थिए। मन्त्रीको सोही निर्देशनअनुसार त्रिवि प्रशासनले पत्राचार गरी निरन्तर समन्वय र दृढ प्रशासनिक कदम चालेको थियो।
परिणामस्वरूप, मन्त्रालयले जिम्मेवारी सम्हालेको ६ महिनाको अवधिमै काठमाडौँ उपत्यकाभित्र मात्रै त्रिविको करिब ७०५ रोपनी जग्गा फिर्ता गराउन सफल भएको हो।
जग्गाको सदुपयोग र आगामी योजना
फिर्ता ल्याइएको यो जग्गा अब पूर्ण रूपमा त्रिविकै हितमा उपयोग गरिनेछ। विश्वविद्यालयको शैक्षिक वातावरणमा सुधार ल्याउन, गुणस्तरीय शिक्षा प्रदान गर्न तथा आगामी दिनमा अत्याधुनिक अनुसन्धान केन्द्र र शैक्षिक पूर्वाधारहरू निर्माण गर्न यस जग्गालाई प्राथमिकताका साथ प्रयोग गरिने मन्त्रालयले जनाएको छ।
