गैरदलीय स्थानीय निर्वाचन र विदेशमा रहेका नेपालीको मतदान अधिकार माग गर्दै कुलमान घिसिङ आयोगमा
गैरदलीय स्थानीय निर्वाचन र विदेशमा रहेका नेपालीको मतदान अधिकार माग गर्दै कुलमान घिसिङ आयोगमा
काठमाडौँ — उज्यालो नेपाल पार्टीका अध्यक्ष कुलमान घिसिङको नेतृत्वमा रहेको टोलीले निर्वाचन प्रणाली सुधार तथा गैरदलीय आधारमा स्थानीय तहको निर्वाचन गराउन माग गर्दै निर्वाचन आयोगमा ज्ञापनपत्र बुझाएको छ।
ज्ञापनपत्रमा नेपालको संविधानको धारा २४६ ले निर्वाचन आयोगलाई दिएको संवैधानिक जिम्मेवारीलाई ध्यानमा राख्दै निर्वाचन प्रणाली सुधार र विदेशमा रहेका नेपाली नागरिकको मतदान अधिकार सुनिश्चित गर्न आवश्यक अध्ययन, सरोकारवालासँग परामर्श तथा सम्बन्धित निकायसँग समन्वय गर्न आग्रह गरिएको छ।
पार्टीका तर्फबाट प्रस्तुत ज्ञापनपत्रमा आगामी स्थानीय तहको निर्वाचनअघि नै गैरदलीय निर्वाचन प्रणालीबारे गहन अध्ययन, आवश्यक कानुनी संशोधन र सोको कार्यान्वयनका लागि समयबद्ध कार्ययोजना तयार गर्न जोडदार माग गरिएको छ।
स्थानीय सरकारलाई दलीय स्वार्थ र दलीय प्रतिस्पर्धाभन्दा माथि उठाएर नागरिक सेवा, स्थानीय विकास र सार्वजनिक जवाफदेहिताको सशक्त माध्यम बनाउनुपर्ने धारणा पार्टीले व्यक्त गरेको छ। साथै, वैदेशिक रोजगारी तथा अध्ययनका सिलसिलामा विदेशमा रहेका ठूलो संख्याका नेपाली नागरिकलाई लोकतान्त्रिक प्रक्रियामा सहभागी गराउन र उनीहरूको मतदान अधिकार सुनिश्चित गर्ने आफ्नो प्रतिबद्धतासमेत पार्टीले दोहोर्याएको छ।
