राष्ट्रिय वाणिज्य बैंकको ३ अर्बको ऋणपत्र बिक्री खुला, वार्षिक ६ प्रतिशत ब्याज पाइने

काठमाडौं, असोज २९ । राष्ट्रिय वाणिज्य बैंक लिमिटेडले आजदेखि सर्वसाधारणका लागि ऋणपत्र निष्कासन तथा बिक्री खुला गरेको छ। बैंकले ‘६ प्रतिशत आरबिबिएल डिबेञ्चर २०८९’ नामक ऋणपत्र सात वर्ष अवधिका लागि वार्षिक ६ प्रतिशत ब्याजदरमा जारी गरेको हो।

बैंकले प्रतिकित्ता १ हजार रुपैयाँ अंकित मूल्यका ३० लाख कित्ता ऋणपत्रमार्फत कुल ३ अर्ब रुपैयाँ जुटाउन लागेको छ। जसमध्ये १२ लाख कित्ता अर्थात् १ अर्ब २० करोड रुपैयाँ बराबरको ऋणपत्र सर्वसाधारणका लागि छुट्याइएको छ भने बाँकी १८ लाख कित्ता निजी तवरबाट बिक्री गरिनेछ।

इच्छुक लगानीकर्ताले न्यूनतम २५ कित्ता अर्थात् २५ हजार रुपैयाँ बराबरको आवेदन दिन सक्नेछन्। अधिकतममा भने उपलब्ध सम्पूर्ण कित्ताका लागि आवेदन दिन सकिने व्यवस्था छ।

ऋणपत्रमा आवेदन दिने समय कात्तिक १० गतेसम्म तोकिएको छ। उक्त अवधिमा पूर्ण आवेदन नपरेमा कात्तिक १२ गतेसम्म आवेदन अवधि थप हुन सक्नेछ।

यस ऋणपत्रमा लगानी गर्न इच्छुक व्यक्तिले ‘मेरो शेयर’ वा सी–आस्बा सेवामा सहभागी बैंक तथा वित्तीय संस्थामार्फत आवेदन दिन सक्नेछन्। ऋणपत्रको निष्कासन तथा बिक्री प्रबन्धक कुमारी क्यापिटल लिमिटेड रहेको छ।