नेपाल रेडक्रसद्वारा बाढीपीडितहरूका लागि व्यापक प्रतिकार्य सुरु
Amrit Kushwaha · २९ असोज २०८३ · 👁 161 पटक पढिएको
काठमाडौं, असोज २९। भोटेकोशी क्षेत्रमा आएको बाढीबाट प्रभावित परिवारलाई राहत तथा पुनःस्थापनाका लागि नेपाल रेडक्रस सोसाइटी र विदुर नगरपालिकाले सहकार्य सुरु गरेका छन्। अन्तर्राष्ट्रिय रेडक्रस तथा रेडक्रिसेन्ट सोसाइटी महासंघ (आईएफआरसी) का महासचिव तथा प्रमुख कार्यकारी अधिकृत जगन चापागाईंको भ्रमणका क्रममा प्रभावित परिवारलाई तत्काल एक लाख रुपैयाँ आर्थिक सहायता उपलब्ध गराउने जानकारी दिइएको हो।
सम्झौताअनुसार रेडक्रसले एक हजार परिवारको जीविकोपार्जन पुनःस्थापना, दुई हजार घरपरिवारलाई आवास भाडा सहयोग तथा ६०० घरपरिवारको प्रत्यक्ष व्यवस्थापन गर्नेछ। साथै, ३० हजार नागरिक लाभान्वित हुने गरी विदुर खानेपानी आयोजनाको ७.५ किलोमिटर पाइपलाइन मर्मत, स्वास्थ्य तथा शैक्षिक पूर्वाधार पुनःस्थापना र सरसफाइमा सहयोग गरिनेछ। कार्यक्रम प्रभावकारी बनाउन संयुक्त समन्वय समिति गठन गरिने जनाइएको छ।
