​बाढीले क्षति पुर्‍याएको मालढुंगा पुल मर्मत गर्न सुरक्षा निकाय फिल्डमै, छिट्टै सञ्चालनमा ल्याउने तयारी

​बागलुङ/पर्वत
कालीगण्डकी नदीमा आएको बाढीका कारण क्षतिग्रस्त बनेको पर्वत र बागलुङ जोड्ने मालढुंगा पुलको मर्मत कार्यलाई तीव्र पारिएको छ। यातायात सञ्चालन छिटोभन्दा छिटो सहज बनाउने उद्देश्यले विगत १० दिनदेखि नेपाली सेना, नेपाल प्रहरी र सशस्त्र प्रहरी बलका सुरक्षाकर्मीहरू निरन्तर मर्मत कार्यमा खटिएका छन्।
​अविरल वर्षासँगै कालीगण्डकी नदीमा आएको बाढीले मालढुंगा पुलको पर्वत खण्डतर्फको पहुँचमार्ग (एप्रोच रोड) कटान गरेपछि आवतजावत ठप्प भएको थियो। बागलुङलगायत पश्चिमी क्षेत्र जोड्ने यो महत्त्वपूर्ण सडक सम्पर्क विच्छेद भएपछि स्थानीय बासिन्दा तथा यात्रुहरूले सास्ती व्यहोर्दै आएका छन्।
​मर्मत कार्यलाई द्रुत गतिमा अघि बढाउन बागलुङस्थित सुरक्षा निकायहरूबाट खटिएका टोलीहरूले जिओ ब्याग भर्ने, ग्याभियन भर्ने तथा कटान भएको पहुँचमार्ग पुनरुत्थान गर्ने कार्य गरिरहेका छन्।
​स्थानीय प्रशासनका अनुसार मर्मत कार्य अन्तिम चरणतर्फ मोडिएको छ र मौसमले साथ दिएमा तथा काम निरन्तर अघि बढेमा छिट्टै पुलमार्फत सवारी साधनको आवतजावत पुनः सञ्चालनमा ल्याउने लक्ष्य राखिएको छ। सुरक्षाकर्मी, प्राविधिक र स्थानीयको संयुक्त प्रयासले कटान रोक्ने र अस्थायी बाटो बनाउने काम तीव्र पारिएको हो।