बाढी-पहिरोको वितण्डापछि पूर्वराजा ज्ञानेन्द्र शाहले दशैंमा सर्वसाधारणलाई टीका नलगाइदिने

बाढी-पहिरोको वितण्डापछि पूर्वराजा ज्ञानेन्द्र शाहले दशैंमा सर्वसाधारणलाई टीका नलगाइदिने

काठमाडौं। देशका विभिन्न भू-भागमा आएको भीषण बाढी, पहिरो र डुबानका कारण ठूलो जनधनको क्षति भएको प्रति दुःख व्यक्त गर्दै पूर्वराजा ज्ञानेन्द्र शाहले यस वर्षको बडादशैं सादगीपूर्वक मनाउने निर्णय गरेका छन्। सोही निर्णयअनुसार यस वर्ष विजयादशमीको दिन निर्मल निवासमा सर्वसाधारणलाई टीका तथा जमरा लगाइदिने कार्यक्रम नरहने भएको छ।

निर्मल निवासस्थित पूर्वराजाको संवाद सचिवालयले आइतबार एक प्रेस विज्ञप्ति जारी गर्दै यस वर्षको दशैं औपचारिक र भव्य रूपमा नमनाई सादगीपूर्वक मनाइने जानकारी दिएको हो।

सचिवालयद्वारा जारी सूचनामा गत भदौ १० गतेको हिमपहिरोका कारण आएको भीषण बाढी र असोज महिनामा परेको अविरल वर्षाले देशका विभिन्न भागमा सयौं मानिसको दुःखद निधन हुनुका साथै हजारौं नागरिक विस्थापित हुनु परेको उल्लेख छ।

विपत्तिका कारण मुलुकले व्यहोर्नुपरेको अपूरणीय क्षति र आम नागरिकको असहज परिस्थितिप्रति संवेदनशील हुँदै पूर्वराजाबाट यो निर्णय लिइएको हो।

‘आफ्नो आस्था, मान्यता र मर्यादालाई कायम राख्दै यस वर्षको बडादशैं पर्व सादगीपूर्वक मनाउने निधो गरिबक्सेको छ,’ संवाद सचिवालयद्वारा जारी सूचनामा भनिएको छ।

साथै, विपत्तिको यस घडीमा परम्परागत धार्मिक निष्ठा कायम राख्दै औपचारिक उत्सव र सर्वसाधारणलाई टीका-जमरा वितरण गर्ने कार्यक्रम स्थगित गरिएको सचिवालयले प्रष्ट पारेको छ।